Былырыын 2021 сыл ыам ыйыттан култуура сайдыытын уонна норуот айымньытын Оройуоннаҕы Киинин иһинэн Надежда Юрьевна Корякина салайааччылаах «Дорҕоон» фольклорнай студия үлэтин саҕалаабыта. Бөлөххө саха төрүт уус-уран айымньытын, фольклор араас жанрын үөрэтэллэр. Быйылгы дьылга баҕалаах дьон өссө элбээн, кэккэлэрэ хаҥаан 32 Далбар хотун саха ырыатын-тойугун, хомуһун утумнаахтык үөрэтэллэр.
Бүгүн алтынньы ый 29 күнүгэр М. Н. Жирков аатынан Оройуоннааҕы култуура Дыбарыаһыгар интэриниэт ситиминэн филологическай наука доктора, доцент, ХИФУ культурологияҕа кафедратын сэбиэдиссэйэ, устудьуоннар «Кылыһах» научнай айар бөлөхтөрүн салайааччыта Людмила Степановна Ефимовалыын көрсүһүү, ырыа-тойук, алгыс ырыатын айылҕатын, анабылын туһунан маастар- кылаас бэрт сэргэхтик буолан ааста. Маастар- кылааска барыта 23 киһи кыттыыны ылла. Манна саха норуотун фольклорун үйэлээх үгэһин утумнааччыларбыт Анна Васильевна Яковлева салайааччылаах «Утум» хомус куруһуогар дьарыктанар Г.И. Чиряев аатынан Бүлүүтээҕи 1№- дээх орто оскуола 8 «б» кылааһын үөрэнээччилэрэ сэргээн кыттыбыттара кэрэхсэбиллээх. Маастар-кылаас түмүгүнэн «Дорҕоон» кыргыттара үгүһү көрөн-билэн, истэн, үөрэтэн санаалара көнньүөрэн өссө элбэҕи айарга-тутарга баҕалаах тарҕастылар. Людмила Степановна «Дорҕооннордуун» салгыы бииргэ үлэлэһэн научнай- практическай семинардары, үөрэхтэри ыытарга санаатын үллэһиннэ.
