«Баҕа санаа», «Чинэкэ кырдалыгар», «Оһуокай», «Быраһаай» диэн ырыалара 50-тан тахса сыл киэҥник тарҕанан умнуллубакка күн бүгүҥҥэ дылы ыллана сылдьар ырыалары бэлэхтээбит киэн туттар биир
дойдулаахпыт Бүлүү улууһун спортка уонна культураҕа историятыгар үтүө өйдөбүлүн хаалларбыт тустууга ССРС спордун маастарыгар кандидат, спортсмен, мелодист Николай Петрович Константинов төрөөбүтэ 75 сааһыгар аналлаах ахтыы киэһэтэ буолла. Бу киэһэни Чернышевскай нэһилиэгин дьаһалтата (баһылык А.С.Амбросьев), П.П.Николаев аатынан «Кыталык» норуот айымньытын Киинэ (директор Н.В.Николаева), аймахтара, үөлээннээхтэрэ тэрийдилэр. Чернышевскайдааҕы библиотека филиалын сэбиэдиссэйэ Л.П.Корякина иилээн-саҕалаан ыытта.
Николай Петрович туһунан иһирэх ахтыылар оҥоһулуннулар. Кини суруйбут ырыаларын икки Александр Корякиттар, Варвара Егорова, Саргылаана Протопопова, Айаал Протопопов, Виктория Михайлова, Анна Черкашина, Саргылаана Семенова, сиэн бырааттара Дьулустаан, Роберт Михайловтар, Үөһээ Бүлүүттэн ыалдьыт Анатолий Герасимов ыллаатылар.
Үтүө киһибит аата умнуллубатын, айбыт ырыалара дьон дууһатыгар уйаланан ыллана турдуннар!
