Олунньу 2 күнүгэр Бүлүү улууһугар ыччат структурата төрүттэммитэ 25 сыллаах үбүлүөйүн бэлиэтиир үөрүүлээх тэрээһин буолла.
Бу күн бастакы аҥарыгар ыччат отделыгар араас сылларга үлэлээн ааспыт начальниктар, специалистар Бүлүү улууһун баһылыга Сергей Николаевич Винокуровы кытта “Төгүрүк остуол” тула олорон кэпсэттилэр, 25 сыл устата туох үлэлэр барбыттарын билиһиннэрдилэр, инникитин туох былааннар туралларын кэпсэттилэр.
Кэпсэтиини ыччат отделын начальнигынан 1993-95 сс. үлэлээбит Макар Семенович Маисов саҕалаата.
Көрсүһүү түмүгэр Сергей Николаевич уонна ыччат отделын начальнига Татьяна Валерьевна Федорова араас сылларга үлэлээбит специалистарга Махтал суруктары, бочуоттаах Грамоталары туттардылар.
Салгыы “Алгыс” СК эҕэрдэ кэнсиэртээх бырааһынньык буолла.
Бүлүү улууһун талааннаах ыччата үҥкүүнэн, ырыанан эҕэрдэлэрин тиэртилэр. Экраҥҥа элбэх хаартыскалар, видеолар көстө турдулар, мустубут дьон бэйэлэрин уонна бииргэ үлэлээбит дьоннорун көрөн үөрүүлэрэ үксээтэ.
Элбэх Махтал суруктары
Элбэх Махтал суруктары, өйдөбүнньүк бэлэхтэри көхтөөх ыччаттар, отделы кытта ситимнэрин быспакка үлэлэһэр, көмөлөһөр дьиэ кэргэттэр, биирдиилээн дьон ыллылар. Отделы кытта бииргэ үлэлэһэр куорат олохтоохторо отдел начальнигар Татьяна Валерьевнаҕа уонна специалистарга бэйэлэрин махталларын тиэртилэр.
Үөрүүлээх тэрээһин ыччат гимнин толоруунан уонна уопсай хаартыскаҕа түһүүнэн түмүктэннэ.
Улуустааҕы культура управлениета.
