Ол курдук, Бүлүүгэ олорон, үлэлээн, айан — тутан ааспыт дьоммут үтүө ааттарын үйэтитиигэ анаан үгүс кэскиллээх тэрээһиннэр былааннанан, үлэ — хамнас ыытылла турар.
Иван Федорович Захаров — Кылыадьы Уус
Олортон биирдэстэрэ Саха АССР култууратын үтүөлээх үлэһитэ, саха хомуһун оҥорууга норуот маастара, Бүлүү улууһун бочуоттаах олохтооҕо, Алгысчыт, тойуксут, оһуокайдьыт, олоҥхону толорооччу Иван Федорович Захаров — Кылыадьы Уус төрөөбүтэ 100 сылыгар анаан бэс ыйын 1-21 күннэригэр аһаҕас хомус уустарын күрэҕэ ыытылынна.
Иван Егорович Алексеев — Хомус Уйбаан
Күрэххэ Сунтаартан, Намтан, Дьокуускай куораттан, Бүлүү куоратыттан, Бүлүү улууһун Арыылаах нэһилиэгиттэн 7 уус күөн күрэстэстилэр. Биллэрин курдук, Кылыадьы Уус хомус ууһун быһыытынан ураты технологиялаах уус, ол курдук, кини хомуһу кутан оҥороро, маны сэргэ, араастаан хомуһун киэргэтэрэ, барельеф оҥороро.
Ол үөрүйэхтэригэр 90-с сылларга Хомус Аан дойдутааҕы түмэлэ, биһиги ытыктыыр, убаастыыр биир дойдулаахпыт Иван Егорович Алексеев — Хомус Уйбаан быһаччы өйөбүлүнэн «Захаров оскуолата» диэн арыйан өрөспүүбүлүкэ араас улуустарыттан 50-ча киһини хомуһу оҥоруу маастарыстыбаларыгар уһуйбута биллэр.
Күрэхпитигэр төнүннэххэ, Дьүүллүүр Сүбэ быһаарыытынан:
— Кылаан бирииһи Саха өрөспүүбүлүкэтин норуотун маастара Николай Николаевич Степанов, Бүлүү куоратыттан ылла уонна Николай Степанов И.Ф.Захаров- Кылыадьы Уус дьиэ кэргэнэ, оҕолоро туруорбут 15 000 солк.харчынан бирииһинэн, Мэҥэ суругунан наҕараадаланна.
— 1 миэстэ Сунтаар улууһун Күүкэйи нэһилиэгиттэн кыттыбыт Дмитрий Викторович Николаев ылла уонна 10 000 солкуобайга сертификаты, Мэҥэ суругу тутуоҕа.
— 2 миэстэни Сунтаар сэлиэнньэтиттэн кыттыбыт хомус ууһа Тартаков Егор Ефимович ылла 8 000 солкуобайдаах сертификаты, Мэҥэ суругу тутар чиэстэннэ.
— 3 бочуоттаах миэстэни Нам улууһун Нам сэлиэнньэтиттэн кыттыбыт уус Прокопий Викторович Никонов ылла уонна 5 000 солкуобайдаах сертификатынан, Мэҥэ суругунан наҕараадаланыа. Бириистээх миэстэлэри ылбыт үлэлэр Бүлүү куоратын И.Ф.Захаров- Кылыадьы Уус аатынан хомус дьиэтигэр үйэ саас тухары хараллыыга туруоруллуохтара. Бука бары кыайыылаахтарга истиҥ эҕэрдэ буолуохтун!
И.Ф.Захаров — Кылыадьы Уус
Биһиги, бүлүүлэр биир кырдьаҕас киэн туттар ууспут И.Ф.Захаров — Кылыадьы Уус үрдүк аатыгар, суон сураҕар ыытыллыбыт күрэхпитин өйөөбүт, кыттыыны ылбыт маастардарбытыгар, Дьүүллүүр Сүбэҕэ тэрийээччилэр уонна Кылыадьы Уус бары оҕолорун, аймахтарын ааттарыттан истиҥник махтанабыт!
