Саха Өрөспүүбүлүкэтин 100, Бүлүү улууһун чулуу дьонун сылларын чэрчитинэн Бүлүү Бөтүҥэр «Дойдум дьоно барахсаттар» диэн сонун тэрээһин буолла. Бөтүҥҥэ төрөөбүт-үөскээбит, мантан кынаттанан, үөрэнэн, идэ ылан араас оройуоннарга үлэлээбит үөлээннээхтэр, сэрии кэмин оҕолоро, үлэ бэтэрээннэрэ, Бөкчөҥөө нэһилиэгин бочуоттаах олохтоохторо, «Гражданскай килбиэн» бэлиэ кавалердара Николай Никифорович Иванов, Николай, Иванович Иванов, Николай Филиппович Трофимов уонна Семен Петрович Алексеев, Николай Иванович Кондаков ахтылҕаннаах Бөтүҥнэригэр кэлэн дьоро күнү тэниттилэр.
Ыалдьыттары бастаан нэһилиэк музейыгар Лидия Прокопьева, Евдокия Петрова үөрэ-көтө көрүстүлэр, музейы көрдөрдүлэр.
Салгыы оскуола үөрэнээччилэрин, учууталларын кытта сэргэх, иһирэх көрсүһүү буолла.
Киэһэ «Арчы» культура Киинигэр үс Ньукулайдар — Н. И. Иванов, Н. Н. Иванов, Н. Ф. Трофимов ахтар-саныыр, киэн туттар Бөтүҥнэрин историятын, дьонун-сэргэтин туһунан хомуйан суруйбут 10-ча кинигэлэрин билиһиннэрдилэр. Семен Алексеев, Николай Кондаков ырыанан-тойугунан ситэрэн биэрдилэр.
Биир дойдулаахтарын нэһилиэк баһылыга А. И. Прокопьев, Бүлүү улууһун бэтэрээннэрин Сэбиэтин бэрэстээтэлин солбуйааччы Д. С. Седалищев, Бөтүҥ ытык киһитэ К. И. Иванов эҕэрдэлээтилэр.
Ыалдьыттарыгар махтанан Николай ИВАНОВ, Аграфена Степанова, Конон Трофимов, Вячеслав Корнилов, Евдокия Ильинова, Дмитрий Эверстов, «Көлүкэчээн» ансамбль (сал. Раиса Петрова) ылбаҕай ырыаларын бэлэхтээтилэр.
50-ча сыллааҕыта ыллаабыт, үҥкүүлээбит кулууптарын саалатыгар Семен Алексеев, Николай Кондаков, Николай Трофимов ахтылҕаннарын таһааран, көрсүһүү үөрүүтүн уруйдаан эһиэкэйи тартылар.
Көрсүһүүлэри үөлээннээхтэрэ культура сайдыытын уонна норуот айымньытын оройуоннааҕы Киинин отделын салайааччыта СР культуратын үтүөлээх үлэһитэ Надежда Иванова иилээн-саҕалаан ыытта.
