Муус устар 10 күнүгэр Бүлүүгэ М.Н. Жирков аатынан культура Дыбарыаһыгар, муус устар 13 күнүгэр Дьокуускай куоракка Д.К. Сивцев-Суорун Омоллоон аатынан опера уонна балет государственнай театрыгар Саха АССР тэриллибитэ 100, киэн туттар биир дойдулаахпыт саха бастакы композитора Марк Николаевич Жирков төрөөбүтэ 130 сылларыгар аналлаах М. Жирков, Г. Литинскэй «СЫГЫЙ КЫРЫНААСТЫЫР» опералара Бүлүү талааннаахтарын уонна искусство деятеллэрин холбоһуктаах бырайыактарынан аан бастаан турбут дьоро түһүлгэтэ улууспутугар, республикаҕа дьоһун сэҥээриини ылла, Дыбарыас, театр саалаларыгар толору мустубут көрөөччүлэр ытыстарын дохсун тыаһынан уруйданна.
Саха музыкальнай эйгэтигэр операны аан бастаан С. А. Зверев — Кыыл Уолун аатынан Үҥкүү Национальнай театрын уонна М. Н. Жирков аатынан Бүлүүтээҕи оҕо искусствотын оскуолатын саха национальнай инструменнарын холбоһуктаах оркестра (салайааччылар Н.П.Петров, Л.Ю. Степанова) доҕуһуоллаата. Опера холбоһуктаах хуорун (хормейстер СР культуратын туйгуна О. Н. Корякина) уонна сүрүн партияларын Бастакы Тоҕус, Чочу, 2 Күүлэт, Бөкчөҥөө нэһилиэктэригэр уонна Бүлүү куоратыгар олорор улуус бары нэһилиэктэриттэн төрүттээх, араас үлэлээх, дьарыктаах эриэккэс куоластаах уус-уран самодеятельность кыттыылаахтара толордулар. Вокал педагога СР үөрэҕириитин туйгуна Маргарита ЛУКИНА, концертмейстердар СР культуратын туйгуна Ольга ТИМОФЕЕВА, СР үөрэҕириитин туйгуна Ольга КИМ сыралаах үлэлэрин бэлиэтиибит.
Опера үҥкүүлэри Үҥкүү театрын эр дьонун труппата, Н. Г. Чернышевскай аатынан Бүлүүтээҕи профессиональнай-педагогическай колледж «Айылгы» Ырыа-үҥкүү народнай ансамблын кыргыттарын бөлөхтөрө ( туруорааччы- хореограф, СР культуратын үтүөлээх үлэһитэ С. П. Бессонова, репетитордар СР үөрэҕириитин, культуратын уонна ыччат политикатын туйгуна В. В. Томскай уонна Ю. П. Федорова) толордулар.
Бу премьераҕа Сыгый Кырынаастыыр партиятын Бүлүүгэ культура сайдыытын уонна норуот айымньытын оройуоннааҕы Киинин специалиһа Салтанат МАЧЧАЕВА, Дьокуускайга Н. Г. Чернышевскай аатынан профессиональнай- педагогическай колледж студентката Нарыйа НИКОЛАЕВА, Туойукчут партиятын культура сайдыытын уонна норуот айымньытын оройуоннааҕы Киинин специалистара Тамара КУЛАНОВА (Бүлүүгэ) Александра ИВАНОВА (Дьокуускайга), Оҕуруочай, партиятын Н. С. Степанов аатынан оскуола учуутала СР культуратын уонна үөрэҕириитин туйгуна Матрена СИВЦЕВА (Бүлүүгэ), Дыбарыас үлэһитэ Нина ВАРЛАМОВА (Дьокуускайга) ситиһиилээхтик толорон биһирэннилэр. Дэгэнэ Дугуй партиятын Н. С. Степанов аатынан оскуола учуутала Василий НИКОЛАЕВ кыайа-хото толордо.
Атын партиялары СР культуратын туйгуна Сергей САВВИНОВ, Владимир БУСЛАЕВ, Иннокентий ШАМАЕВ, Александр ИВАНОВ, Владимир ПЕТРОВ, Айсиэн ТРОФИМОВ, СР ыччат политикатын туйгуна Владислав ПОТАПОВ, Ренат ИВАНОВ, Валерий ТРОФИМОВ, СР культуратын туйгуна Николай АФАНАСЬЕВ-АЙДАМАН толордулар.
Дьокуускайдааҕы премьераҕа СР судаарыстыбаннай сүбэһитэ А. С. Борисов, СР Бырабыыталыстыбатын бэрэссэдээтэлин солбуйааччы С. В. Местников, СР культураҕа уонна духуобунай сайдыыга министрэ Ю. С. Куприянов бу туруорууну норуот оператынан сыаналаан туран бырайыак көҕүлээччитэ улуус баһылыга С. Н. Винокуровка, туруорааччы-режиссер СР үтүөлээх артыыһа Прокопий НЕУСТРОЕВКА, туруорааччы-дирижер СР искусствотын үтүөлээх деятелэ Николай ПЕТРОВКА, туруорааччы- худуоһунньук РФ уонна СР искусстволарын үтүөлээх деятелэ Лена ГОГОЛЕВАҔА, сиэргэ-туомҥа, этнографияҕа сүбэһит РФ культуратын үтүөлээх үлэһитэ, СР үтүөлээх артыыһа Афанасий ФЕДОРОВКА, композитор СР искусствотын үтүөлээх деятелэ Кирилл ГЕРАСИМОВКА, С. А. Зверев- Кыыл Уолун аатынан Үҥкүү Национальнай театрын коллективыгар, опера кыттыылаахтарыгар, бары үлэлэспиттэргэ, өйөөбүттэргэ махтаннылар.
СР Судаарыстыбаннай Мунньаҕын (ИлТүмэн) бэрэссэдээтэлэ А. И. Еремеев аатыттан сибэккилээх корзина, СР Бырабыыталыстыбатын бэрэссэдээтэлэ А. В. Тарасенко Махтал Суруга туттарылыннылар.
Үөрүүлээх күн Культураҕа уонна духуобунай сайдыыга министрэ Ю. С. Куприянов культура сайдыытын уонна норуот айымньытын оройуоннааҕы Киинин специалиһа А. Е. Борисоваҕа, М. Н. Жирков аатынан Бүлүүтээҕи оҕо искусствотын оскуолатын преподавателэ М. Н. Лукинаҕа «Саха Республикатын культуратын туйгуна» бэлиэни туттарда.
Тыл этээччилэр Саха Республикатын күнүгэр — муус устар 27 күнүгэр Москва куоракка республика аатыттан өрөгөйдөөх түһүлгэни тэрийэр Бүлүү улууһугар ситиһиини алҕаатылар. Опера туһунан «САХА» КИК «Тэтим» радиотыгар тележурналист Альбина ТАРАБУКИНА таһаарбыт быһа эфирэ республика истээччилэрин, көрөөччүлэрин киэҥ сэҥээриитин ылла.
Үрдүк сыанабылы кытта ис сүрэхтэн эҕэрдэни искусство ааттаах-суоллаах биллэр-көстөр деятеллэрэ уонна сүгүрүйээччилэрэ кэрэхсээн анаан-минээн эттилэр.
Талааннаах биир дойдулаахтарбыт Ытык Бүлүү культура уонна искусство биһигэ буоларын өссө төгүл киэҥ эйгэҕэ таһаарбыттарынан киэн туттабыт, махтанабыт!
