Бэс ыйын 26-27 күннэригэр Өлүөхүмэ куоратыгар ыытыллыбыт XIV өрөспүүбүлүкэтээҕи Олоҥхо Ыһыаҕын культурнай программатыгар кыттыбыт бөлөҕү Культура уонна норуот айымньытын сайдыытын Киинин уус-уран салайааччыта Н. А.Афанасьев салайан сырытта. Барыта 16 кыттааччы фольклор араас хайысхаларыгар, уустар күрэхтэригэр, иис-уус быыстапкатыгар уонна Ыһыах араас тэрээһиннэригэр ситиһиилээхтик кытыннылар.
Саха Республикатын культуратын туйгуннара Николай Афанасьевка уонна хомусчут-импровизатор, Дьөккөннөөҕү «Сарыал» норуот айымньытын Дьиэтин директора Айаал Дмитриевкэ саха улуу Олоҥхотун, фольклорун үйэтитиигэ, үөрэтиигэ, тарҕатыыга кылааттарын иһин Саха Республикатын Аҕа баһылыгын иһинэн «Олоҥхо» национальнай тэрийэр комитетын БОЧУОТУНАЙ ГРАМОТАТЫН тэрийэр комитет бэрэстээтэлэ, СР Судаарыстыбаннай Мунньаҕын (Ил Түмэн) бэрэстээтэлин бастакы солбуйааччы А.Н. Жирков туттарда.
Ситиһиилэр:
Культура уонна норуот айымньытын Киинин иһинэн быйыл тэриллибит «Дьүһүлгэн» фольклорнай бөлөх (сал.Н.Афанасьев) олоҥхону бөлөҕүнэн толоруу хайысхатыгар П.П. Ядрихинскай «Дьырыбына Дьырылыатта Кыыс бухатыыр олоҥхотун толорон «Олоҥхону куолаан толоруу кэскилэ» анал аат хаһаайына буолла.
