СӨ Олоҥхо Дьиэлэрин биир кэлим ситимин олохтооһуҥҥа култуурунай экспедиция Бүлүү улууһугар үлэтин чэрчитинэн Олоҥхо Тыйаатырын артыыстара көрдөрбүт П. Бурнашев «Кыыс Дэбилийэ» олоҥхотунан испэктээҕи (туруорааччы-режиссер С. И. Борисова) көрө-истэ М. Н. Жирков аатынан оройуоннааҕы культура Дыбарыаһын саалатыгар көрөөччү толору муһунна.
— Испэктээк саҕаланыытыгар СӨ Судаарыстыбаннай Сүбэһитэ, СӨ Геокултуурунай сайдыыга үнүстүтүүтүн генеральнай дириэктэрэ А. С. Борисов биир дойдулаахтарын — бүлүүлэри ис сүрэҕиттэн эҕэрдэлээтэ, саха төрүт фольклорун тарҕатыыга кылааттарын киллэрбит У. М. Каратаеваҕа, В. П. Дашевскаяҕа, Мэҥкэр Сэмэн Хабырыыл уолугар Махтал Суруктары туттарда.
Көрөөччүлэр «Кыыс Дэбилийэ» олоҥхо хас биирдии дьоруойун толоруутун ытыс көхтөөх дохсун таһынан биһирээтилэр.
Улуус баһылыгын социальнай политикаҕа солбуйааччы А. А. Прокопьев, култуура сайдыытын уонна норуот айымньытын оройуоннааҕы Киинин салайааччыта А. А. Дашевская Тыйаатыр кэллэктиибигэр, СӨ култууратын туйгуннара Кыыс Дэбилийэ оруолун толорбут кэскиллээх артыыска Анастасия Алексееваҕа, биир дойдулаахпыт Гаврил Менкяровка, маастар-кылаастары ыыппыт исписийэлиистэргэ Махтал Суруктары туттардылар. Олоҥхону тыл, тойук, муусука, грим, көстүүм, уот-күөс, хамсаныы нөҥүө олус тиийимтиэтик тиэрдэн көрөөччүнү биһирэппит Олоҥхо тыйаатырын артыыстарыгар алыптаах айар үлэҕитигэр өссө да саҥаттан-саҥа арыйыылары, кэрэхсэбиллээх көрдөрүүлэри баҕарабыт, бүлүүлэр ааттарыттан урааҥхайдыы уруйдуубут, сахалыы дорҕоонноохтук «НОО!» диибит!
Көрсүөххэ диэри!
