Саха Өрөспүүбүлүкэтин Үүнэр көлүөнэ тыйаатыра (дириэктэр В.Н.Охлопков, уус-уран салайааччы саха норуодунай артыыһа А.П.Павлов) Бүлүү сүнньүн улуустарынан гастрола саҕаланна. Тыйаатыр бүгүн Бүлүү куоратыгар М.Н.Жирков аатынан оройуоннааҕы култуура Дыбарыаһыгар гастроль бөлөҕүн салайааччыта, тыйаатыр кылаабынай режиссера СӨ искусстволарын үтүөлээх диэйэтэлэ Александр Титигиров туруоруутунан оҕолорго хотугу норуоттар остуоруйаларынан «Кэҕэ», Федор Достоевскай «Преступление и наказание» романынан «Хроника безумия » испэктээктэри көрдөрдө.
Бүлүү оҕолоро үс көрдөрүүнү толору саалаҕа көрөн астыннылар, дохсун ытыс тыаһынан биһирээтилэр.
Улуус баһылыгын социальнай политикаҕа солбуйааччы А. А. Прокопьев, култуура сайдыытын уонна норуот айымньытын оройуоннааҕы Киинин салайааччыта А. А. Дашевская тыйаатыр кэллэктиибигэр, режиссер А. В. Титигировка Махтал Суруктары туттардылар. Биир дойдулаахтарбыт салайар, үлэлиир Тыйаатырдара ыччат көлүөнэҕэ аан дойду бастыҥ айымньыларын тыйаатыр ураты тылынан, уран дьүһүйүүтүнэн тиэрдэр, тарҕатар артыыстарыгар махтанабыт, айар үлэлэригэр ситиһиини баҕарабыт! Салгыы саҥа туруорууларга көрсүөххэ диэри!
