От ыйын 14 күнүгэр өрөспүүбүлүкэбит ыччатын “ТАБЫС” (Таптаа, Алҕаа, Байыт Ытык Сиргин) фестивалыгар Саха АССР 100 сылыгар анаммыт хамаандалар бэйэлэрин улуустарын театральнай дьүһүйүүнэн билиһиннэрэр бастакы күрэхтэрэ түмүктэннэ. Тус хоту Анаабыр улууһуттан тиийэ ох курдук оҥостон, бэлэмнэнэн кэлбит хамаандалар дойдуларын дириҥ историятын, культуратын, киэн туттар дьоннорун бэриллибит кылгас бириэмэҕэ арыйар кэрэхсэбиллээх туруоруулары көрдөрдүлэр.
Бу, элбэх толкуйу, бэлэмнэниини эрэйэр күрэҕи, Былатыан Ойуунускай аатынан Саха драматическай театрын директора П.Т.Макаров бэрэссэдээтэллээх дьоһун хамыыһыйа сыаналаабыта күрэх суолтата улаханын, үрдүгүн туоһулуур. Кинини сэргэ СӨ Ил Дарханын уонна СӨ бырабыыталыстыбатын ис политикаҕа департаменын салайааччытын солбуйааччы Н.П.Федорова, СӨ Культураҕа уонна духовнай сайдыыга министиэристибэтин тустаах үлэһиттэрэ И.И. Осипов, Е.В.Ефимов, О.Е. Пономарева үлэлээтилэр.
Күрэххэ уопсайа 14 улуус уонна 4 уопсастыбаннай түмсүү итэҕэтиилээх туруорууларын көрөөччүлэр ытыс тыаһынан көрүстүлэр, оруолларын кыһаллан толорууларын сөҕө-махтайа көрдүлэр. Түмүккэ, хамыыһыйа быһаарыытынан, тыҥааһыннаах күрэх кыайыылаахтара ааттаннылар:
Түмсүүлэргэ: I миэстэ– студеннар республикатааҕы түмсүүлэрэ, II миэстэ- Бүлүү ыччатын сүбэтэ, III миэстэ – республика улуустарын ыччатын «ZEMA» түмсүүтэ.
Улуустарга: I миэстэ- Бүлүү, II миэстэ- Хаҥалас, III миэстэ –Чурапчы.
Бары кыайыылаахтарга туоһу суруктар, бастаабыттарга улууспутуттан Ил Түмэн депутата Александр Гоголев “Haier 32 Smart TV MX Android TV” телевизордара, атын миэстэлэспиттэргэ «Эгэлгэ» атыы дьиэтин (ИП Николаев Ф.Н.), уонна “Уютный дом” хаһаайыстыбаннай маркет (ИП Сутурин А.А.), сыаналаах бириистэр туттарылыннылар. Үтүө санаанан күрэҕи өйөөбүт дьоммутугар тэрийээччилэр ааттарыттан истиҥ махталбытын тиэрдэбит.
Өрөспүүбүлүкэтээҕи күрэх кыайыылаахтарын -улууспут ыччатын хамаандатын, ол иһигэр өрүү инники күөҥҥэ сылдьар биир идэлээхтэрбитин, үрдүк ситиһиилэринэн истиҥник эҕэрдэлиибит. Инникитин да, бу саҕалааһын курдук көхтөөх, көрдөөх, сонун толкуйдаах, ураты көрүүлээх, сайдар суол устун дохсуннук айаннааҥ!.
