От ыйын 22 күнүгэр Марк Жирков аатынан култуура оройуоннаа5ы дыбарыаһыгар Уус Алдан Бороҕонугар ыытыллыбыт Саха сирин норуоттарын VIII спортивнай оонньууларын ону сэргэ Бүлүү улууһугар ыытыллыбыт Саха сирин эдэр ыччатын «ТАБЫС» фестивалын түмүктэрин таһаарар, кыайыылаахтарын чиэстиир үөрүүлээх тэрээһин ыытылынна.
Өрөспүүбүлүкэ икки улахан күрэхтэһиитин кыттыылаахтара, тэрийээччилэрэ Дыбарыаска киирии аантан сүргэлэрэ көтөҕүллэн, үөрэ-көтө хардарыта эҕэрдэлэһэн, көрөөччү саалатыгар ааһан долгуйа олордулар…..
Үһүйээҥҥэ ахтыллыбыт ат бөҕө, кус быһый Майаҕатта Бэрт Хара удьуордара түөлбэлээн олохсуйбут уйгу сирдэригэр -Уус Алдаҥҥа ыытыллыбыт VIII спортивнай оонньуулар тустарынан тус санааларын билиһиннэрэн туран, “Бүлүү улууһа (оройуона)” муниципальнай оройуон баһылыга Сергей Николаевич Винокуров уонна бастакы солбуйааччыта Иван Иванович Евсеев улуус хамаандатыттан буулдьанан ытыы, чэпчэки атлетика, бокс, спортинг көрүҥнэригэр миэстэлэспит спортсменнарга уонна тренердэргэ бочуоттаах суруктары уонна харчынан бириэмийэлэри туттардылар.
Өрөгөйдүүн сиэттиспит, кыайыыннан кынаттаммыт биир дойдулаахтарын Кыргыдай нэһилиэгин баһылыга В.Е.Александров, Баппаҕаайы нэһилиэгин, Бүлүү куорат дьаһалталарын бэрэстэбиитэллэрэ, депутаттар эҕэрдэлээбиттэрэ ытыс тыаһынан доҕуһуолланна.
Иккис сүрүн түһүмэх “ТАБЫС” култуура- үөрэх фестивалыгар улуус чиэһин дьулуурдаахтык көмүскээбит ыччаттарбытыгар ананна. 3 күннээх араас көрүҥнээх күрэхтэһиилэр түмүктэринэн түмсүүлэр ортолоругар Бүлүүбүт улууһун ыччатын Сүбэтэ бастакы миэстэни ылан, 350 тыһ.солк. суммалаах сертификатынан наҕараадаламмыта. Онтон улуус ыччатын хамаандата Сахабыт сирин 16 улууһун күүстээх хамаандаларын кытары тыҥааһыннаах киирсиигэ таһыччы кыахтааҕын, күүстээҕин, түмсүүлээҕин көрдөрөн, фестиваль муҥутуур кыайыылааҕынан тахсан, сүрүн бириис “УАЗ- Охотник” массыынаны тутан хаалбыта.
Ити курдук, фестиваль кылаан кыайыылаахтарынан тахсыбыт Бүлүүбүт ыччатын хамаандаларын оройуон баһылыга Сергей Винокуров анал бириэмийэлэринэн наҕараадалаата. Инникитин эдэр ыччат өссө ыкса түмсэн улуус олоҕор-дьаһаҕар, сайдыытыгар эрчимнээхтик кыттарыгар баҕа санаатын эттэ.
Бу киэһэ «ТАБЫС» фестиваль кыттааччыларын сэргэ улахан түһүлгэни тэрийиигэ үлэлэспит, көмөлөспүт улуус тэрилтэлэригэр, биирдиилээн дьоҥҥо, бириистэри туруорбут спонсордарга Өрөспүүбүлүкэтээҕи тэрийэр комитет уонна улуус дьаһалтатын аатыттан махтал бастыҥ тыллардаах суруктар туттарылыннылар.
Түмүккэ, культура сайдыытын уонна норуот айымньытын оройуоннааҕы киинэ фестиваль культурнай – маассабай тэрээһиннэригэр көмөлөспүт уонна көхтөөхтүк кыттыбыт өрүү көхтөөх-көрдөөх, талааннаах ыччаттарга махтал истиҥ тылларын анаата. Үөрүүлээх көрсүһүү, күлүм түгэн кыттыылаахтарыгар барыларыгар ырыанан-тойугунан эҕэрдэтин тириэртэ.
Бүлүүбүт аатын үрдүктүк тутан аар-саарга аатырдар кыахтаах, дьоҕурдаах, дьоммутугар самаан сайын умнуллубат бэлиэ түгэннэрин сылаас тыыныгар угуттанан, айылҕалыын алтыһан, күүстэ – уохта эбинэн, туруккутун бөҕөргөтөн иннигит диэки эрчимнээхтик хардыылаан, саҥаттан саҥа үрдэллэри дабайан иһэргитигэр баҕарабыт !
