Быйыл сайын Үөһээ Бүлүүгэ бэс ыйыгар ыытыллыахтаах XV Өрөспүүбүлүкэтээҕи Олоҥхо Ыһыаҕар бэлэмнэнии чэрчитинэн Кэнтик сэлиэнньэтигэр ыытыллыбыт “Чап Уустара» Өрөспүүбүлүкэ тимир уустарын быыстапка-күрэҕэр Бүлүү улууһуттан тимир уустарбыт баран көхтөөх кыттыыны ыллылар. Бу күрэххэ «Саха хомуһа» хомус оҥоһуутун көрүҥэр 1 миэстэни Николай Ильич Гоголев – Бычаа Уус, Саха Өрөспүүбүлүкэтин уус-уран оҥоһуктарын маастара Бүлүү куоратыттан ылла. Николай Ильич тэрийээччилэр ааттарыттан туоһу суругу уонна сыаналаах бириис тутан үөрдэ-көттө.
Болгуо быһах, легированнай быһахха, кыптыый оҥоһуутун күрэхтэригэр 2 миэстэни элбэҕи эрэннэрэр эдэр ууспут, Саха Өрөспүүбүлүкэтин уус-уран оҥоһуктарын маастара Бүлүү улууһун Сыдыбылыттан Семен Семенович Томскай ылла уонна сыаналаах бириистэринэн, туоһу суруктарынан наҕараадаланна.
Бүлүү тимир уустарын бу үрдүк ситиһиилэринэн эҕэрдэлиибит! Өссө да үрдүктэн үрдүк ситиһиилэр кэлэн истиннэр!
