Кулун тутар 17 күннэригэр Бүлүү улууһун норуотун маастара Афанасьева Ирина Зиновьевна «ИИС АБЫЛАҤА» диэн тус быыстапката ситиһиилээхтик түмүктэннэ.
Саха иистэнньэҥэ улахан ииһинэн дьарыктанарга өбүгэ ииһин уратыларын, кистэлэҥнэрин элбэҕи билэн-көрөн кутун-сүрүн бэлэмнээн баран ылсар үгэстээх. Сахалыы сиэрдээх, истиҥ иэйиилээх, олоҕу, айылҕаны ураты хараҕынан көрөр буолан харах үөрэр, кэрэхсиир айымньыларын, малларын-салларын айан, оҥорон таһаарар. Киһи эрэ сүгүрүйэр үйэлээх үтүө идэни баһылыыр.
Биһиги Бүлүүбүт былыр-былыргыттан ыраах сиринэн аатырбыт уран уустарынан биллэр-көстөр. Көмүс сүүтүктээх иистэнньэҥнэрдээх буолан өбүгэлэрбит илии ииһигэр ураты суоллара-иистэрэ, үйэттэн үйэҕэ илдьэ сылдьыбыт ньымалар, үгэстэрэ күн бүгүн биһиэхэ тиийэн кэлэн ситим салҕанар, сайдар.
Ирина Зиновьевна, өссө төгүл «Иис абылаҥа» айар быыстапкаҥ ситиһиилээхтик түмүктэммитинэн ис сүрэхтэн эҕэрдэлиибит! Баҕарабыт кытаанах доруобуйаны, тус олоххор дьолу, айар тутар үлэҕэр салгыы саҥа ситиһиилэри баҕарабыт!
