“Эппэр ийэм үүтүн кытта
Иҥмит эбит, быһыыта
Кустук өҥнөөх,
Кымыс сыттаах
Сахам мандар саҥата…»
С. Данилов
Төрүт тыл, сурук-бичик күнүгэр аналлаах оскуола оҕолоругар улуустааҕы «Тыл хонуута” викторина олунньу 14 күнүгэр М.Н. Жирков аатынан култуура Дыбарыаһыгар буолан ааста. Г.И. Чиряев аатынан Бүлүүтээҕи 1 №-дээх орто оскуолаттан 8 «б» кылаас “Сибэкки” хамаандата (салайааччылар: Максимова Р. А., Аммосова И.М.) уонна 10 “б” кылаас “Сайдам” хамаандата (салайааччылар: Филиппова Нь.И., Харлампьева Л.И.), Г.С. Донской аатынан Бүлүүтээҕи 2 №-дээх орто оскуолаттан “Дьүкээбил” хамаанда (салайааччылар: Васильева Т.С., Тимофеева А.В.), Н.С. Степанов аатынан Бүлүүтээҕи 3 №-дээх орто оскуолаттан 8 кылаас үөрэнээччилэрин «Сайдыы” хамаандата (салайааччы: Муксунова Мария Касьяновна), И.Л. Кондаков аатынан Бүлүүтээҕи гимназияттан 7 кылаас үөрэнээччилэрин «Химик Кондаков сиэннэрэ” хамаандата уонна 9 кылаас үөрэнээччилэрин «Кондаков ыччаттара” хамаандата (салайааччы: Семенова Л.В.), Г.Ф. Николаев аатынан Бөтүҥ орто оскуолатын үөрэнээччилэрин “Кэнчээри” хамаандата (салайааччылар: Иванова Н.Г., Харлампьева О.Г.) кыттыыны ыллылар.
Викторина 7 түһүмэҕинэн оонньонон ааста: бэйэни билиһиннэрии, таабырын таайбараҥа, Алиас оонньуу, блиц ыйытыылар, уран тыллары быһаар, өс хоһооннору салҕаа, тылтан тыллары таһаарыы. Тыҥааһыннаах күрэхтэһии кэнниттэн бочуоттаах III миэстэни ыллылар Г.С. Донской аатынан Бүлүүтээҕи 2 №-дээх орто оскуолаттан “Дьүкээбил” хамаанда, II миэстэ Г.Ф. Николаев аатынан Бөтүҥ орто оскуолатын үөрэнээччилэрин “Кэнчээри” хамаандата, кыайыылаах үрдүк аатын сүктэ I миэстэни ылла И.Л. Кондаков аатынан Бүлүүтээҕи гимназияттан «Кондаков ыччаттара” хамаандата. Миэстэлэспит хамаандаларга сыаналаах бириистэр, добун суруктар туттарылыннылар. Кыттааччыларга барыларыгар туоһу суруктар, салайааччыларга махтал суруктар тэрийээччилэр ааттарыттан туттарылыннылар.
Дьүүллүүр сүбэҕэ үлэлээтилэр: Иванова Мария Андреевна, Өрөспүүбүлүкэҕэ бастакы ыччат библиотекатын ведущай библиотекаря, үөрэҕи бүтэрбит идэтинэн саха тылын уонна литературатын учуутала, Лебедева Матрена Николаевна, Оройуоннааҕы култуура уонна норуот айымньытын сайдыытын киинин фольклорга специалиһа, Татаринова Василина Васильевна, «Олох суола” хаһыат корреспондена, үөрэҕи бүтэрбит идэтинэн саха тылын уонна литературатын учуутала.
Викторинаҕа көхтөөх кыттыыны ылбыт оҕолорбутугар, оҕолору бэлэмнээбит учууталларга, салайааччыларга, дьүүллүүр сүбэҕэ тэрийээччилэр ааттарыттан: оройуоннааҕы култуура сайдыытын уонна норуот айымньытын Киинин, Бүлүү улууһун үөрэҕириитин салалтатын аатыттан махталбытын тиэрдэбит. Баҕарабыт үлэҕитигэр Өлүөнэ очуостарыныы үрдүк ситиһиилэри, үрдүгүтүгэр өрүү ыраас халлааны, тус олоххутугар дьолу-соргуну!
