Бүлүү дьоно-сэргэтэ былыр-былыргыттан тимир, мас уустарынан, кетүллүбэт сииктээх иистэнньэҥнэринэн, хагдарыйан турар маһы кеҕөрде туойар уус тыллаах олоҥхоһуттарынан, ырыаһыттарынан суон сураҕырар.
Бүлүү улууһун маастардара россия, норуоттар икки ардыларынааҕы, россия регионнарын таһымыгар ыытыллар быыстапкаларга, фестивалларга, күрэхтэргэ кыттаннар Ытык Бүлүү сирин аатын үрдүктүк ааттаталлар.
Быйыл Россия норуоттарын культураларын нэһилиэстибэтин, Саха АССР төрүттэммитэ 100 сылыгар, Саха Республикатыгар Ийэ сылыгар уонна Бүлүүбүт улууһугар биллиилээх дьон сылыгар анаммыт сылга муус устар 15 күнүгэр Бүлүү улууһугар Норуот маастарын күнэ ыытылынна. Бу күн «Наше наследие» республикаҕа ыытыллар көрүү-күрэх чэрчитинэн улуус маастардарын, тарбахтарыгар талааннаах дьонун улахан быыстапкалара тэрилиннэ. Маастардар бэйэлэрин сатабылларын ыччат дьоҥҥо, бу күн мустубут улууспут олохтоохторугар иҥэрэн араас хайысхалаах маастар-кылаастары ыыттылар.
Саха төрүт үгэһин тутуһан уһаныы, иистэнии, саха норуотун уус-уран оҥоһуктарын сайдыытын тула киэҥ кэпсэтии ыытылынна. Норуот маастардарын дьоро күнүгэр нэһилиэктэр дьаһалталара, норуот маастардара үлэлиир, үлэлээбит тэрилтэлэрэ кэлэн чиэстээтилэр, үөрүүлэрин үллэһиннилэр.
Бу дьоро киэһэ «Невский ларец», «Этно-Эрато», «Сокровища Севера», «Уникальная Россия», «Сохраняем традиции» россия, норуоттар икки ардыларынааҕы фестиваллар, күрэхтэр кыайыылаахтарын, кыттыылаахтарын сахалыы төрүт, этническэй таҥастарын көрүү, эҕэрдэ кэнсиэр ыытылынна. Бүлүүбүт талааннаах маастардарын аата ааттана турдун, айар үлэҕит аартыга арыллан, үрдүктэн үрдүк ситиһиилэр кэлэн истиннэр!
«Оройуннааҕы культура сайдыытын уонна норуот айымньытын киинэ» МБТ информационнай-методическай отдела
