1945 сыллаахха ыам ыйын 1 күнэ үүнэр түүнүгэр кыайтарбыт Рейхстаг үрдүгэр Кыайыы Кыһыл былааҕа кытара кыыспыта. Кутузов 2-с истиэпэ уордьаннаах 150-с Идрицкэй стрелковай дивизия кыһыл армеецтара Алексей Берест, Михаил Егоров уонна Мелитон Кантария туруорбут штурмовой былаахтара сэбиэскэй норуот хорсун быһыытын бэлиэтэ буолбута, Кыайыы Знамятынан ааттаммыта
Ыам ыйын 8 күнүгэр албан ааттаах үс Дьоруой төрөөбүт дойдута Бүлүү олохтоохторо уонна ыалдьыттара Улуу Кыайыы 78 сылын бэлиэтиир кэрэ-бэлиэ күнүн көрсө Кыайыы Знамятын куоппуйатын таһаарыыга аналлаах үгэс буолбут үөрүүлээх тэрээһинигэр кытыннылар.
Афанасий Иннокентьевич Николаев аатынан Албан Аат түмэлиттэн Сэбиэскэй Сойуус Дьоруойа Николай Саввич Степанов аатынан Бүлүүтээҕи 3 №-дээх орто оскуола юнармеецтара Кыайыы Знамятын куоппуйатын тутан улуус дьаһалтатын дьиэтигэр аҕалбыттарын мустубут дьон уруйдуу-айхаллыы көрүстэ.
Бүлүү уонна Үөһээ Бүлүү оройуоннарын байыаннай комиссара С.Н.Харлампьев юнармеецтары эҕэрдэлээтэ, улуус баһылыга С.Н. Винокуровка дакылааттаата.
Кыайыы Знамятын куоппуйатын улуус баһылыга С.Н. Винокуров, Бүлүү оройуоннааҕы Сэбиэтин бэрэссэдээтэлэ.Г.С.Корякин, Бүлүү улууһун бэтэрээннэрин Сэбиэтин бэрэссэдээтэлэ Г.С. Солтуев, Бүлүү.куоратын баһылыгын солбуйааччы Н.В.Иванов күөрэччи көтөхтүлэр.
Г.С. Донской аатынан Бүлүүтээҕи 2 №-дээх орто оскуола 4 “в” кылааһын үөрэнээччилэрэ (кылаас салайааччыта Петрова Наталья Романовна) хоһоон ааҕан эҕэрдэлээтилэр.
Ытык бэлиэ – Кыайыы Знамята,
Элбэх да сыллары уҥуордаан
Өрөгөй ырыата аргыстаах
Тиийэн кэллиҥ биһиэхэ!
Улуу Кыайыы сыанатын, өрөгөйүн
Үүнэр көлүөнэҕэ саната, өйдөтө,
Дууһаны долгута, сүргэни көтөҕө
Дойду үрдүнэн кытыаста умай дуу,
Эн – Улуу Кыайыы Знамята!
