Бу күннэргэ сандал саас бастакы бырааһынньыгар — Аан дойду дьахталларын күнүгэр аналлаах элбэх тэрээһиннэр аастылар. Мааны бырааһынньыгы салҕаан М. Н.Жирков аатынан оройуоннааҕы культура Дыбарыаһыгар Ытык Бүлүү туонатын кэрэ Хотун Куоларын кэрэхсиир, кинилэргэ сүгүрүйэр дьоро түһүлгэ –“МИССИС ВИЛЮЙ – 2023” буолла. Күрэҕи сэргээн саалаҕа көрөөччү толору муһунна.
Күрэххэ саха мааны далбар Хотуттара Ньурбаттан Анна Дмитриева, Аэлита Дьячковская, Бүлүү куоратыттан Нюргуяна Харлампьева, Сахаяна Варламова, Хаҕынтан Ирина Афанасьева кытыннылар.
Кыттааччылар «Бэйэни билиһиннэрии», «Талба талаан», «Спортивнай флешмоб үҥкүү», «Үлэ киһини киэргэтэр», «Киэһээҥҥи мааны көстүү» түһүмэхтэргэ дьоҕурдарын, сатабылларын көрдөрдүлэр, кэрэлэринэн кэрэхсэттилэр, талааннарынан үөртүлэр. Кыттааччылар хас биирдии тахсыыларын көрөөччүлэр дохсун ытыс тыаһынан көҕүлээтилэр.
Дьүүллүүр Сүбэ (бэрэссэдээтэл улуус баһылыгын социальнай политикаҕа солбуйааччы Александр Прокопьев) быһаарыытынан «МИССИС СПОРТ-2023» — Нюргуяна Харлампьева (Бүлүү к.), “МИССИС ТАЛАНТ — 2023” – Анна Дмитриева (Ньурба к.), “МИССИС ПРОФЕССИЯ — 2023” (Ирина Афанасьева, Бүлүү, Хаҕын с.), “1 ВИЦЕ МИССИС — 2023” (Аэлита Дьячковская, Ньурба к.) ааттарын ылан үөртүлэр.
Күрэх Кылаан кыайыылааҕын аатын Сахаяна Варламова (Бүлүү к.) ылла!
“КӨРӨӨЧЧҮЛЭР БИҺИРЭБИЛЛЭРЭ — 2023” бириис хаһаайкатынан Аэлита Дьячковская, Ньурба к.) ааттанна!
Күрэххэ спонсордаабыт “Илгэ” потребоществоҕа (салайааччы Ольга Александровна Алексеева), “Драгоценности Якутии” ювелирнай маҕаһыын Бүлүүтээҕи филиалыгар (мененжер Виктория Васильевна Евсеева), «Аламай” сибэкки салонугар (ИП Лидия Викторовна Томская), “Золотая аура” ювелирнай маҕаһыыҥҥа (ИП Раиса Васильевна Родионова) тэрийээччилэр ааттарыттан махтанабыт.
Бүлүүбүт туонатын мааны далбар кэрэ аҥардара, бу курдук куруук дьоҥҥо кэрэ, үөрүүлээх түгэннэри бэлэхтии сылдьыҥ, тупса туругура туруҥ, үүнэн-үрдээн иһиҥ! Ытык Бүлүүбүт илгэлээх биэрэгэр Айыыһыт алгыһынан арчыланан кэрэ Хотун ааттанан, үс саханы үксэтэн, түөрт саханы төрөтөн, кэнчээри ыччаты тэнитэн уһуннук, дьоллоохтук, саргылаахтык олороргутугар баҕарабыт!
