Бүлүү улууһугар Хомус нэдиэлэтэ сэтинньи ый 30 күнүттэн ахсынньы ый 7 күнүгэр диэри ыытылынна.
Хомус нэдиэлэтин үөрүүлээх арыллыытыгар, сэтинньи 30 күнүгэр Саха Өрөспүүбүлүкэтин үтүөлээх артыыһа, биир дойдулаахпыт виртуоз-хомусчут Альбина Дегтярева кыттыылаах куйаар ситимин нөҥүө (zoom) хомуһу күргүөмүнэн тардыыга үгүс нэһилиэктэртэн барыта 51 киһи Дьокуускайтан , Кыргыдайтан, Чинэкэттэн, Дьөккөнтөн, Бүлүүттэн култуура иһинэн үлэлиир «Ыллык» түмсүү, «Дорҕоон» фольклорнай бөлөх, Бүлүүтээҕи алын сүһүөх, орто оскуола үөрэнээччилэрэ, Бүлүүтээҕи 2-с нүөмэрдээх алын сүһүөх оскуолатын 3 «в» кылаас оҕолоро, кылаас салайааччыта Петрова Наталья Романовна кыттыыны ылбыттара.
Нэдиэлэ устата хомуска аналлаах муниципальнай тэрилтэлэргэ араас хабааннаах тэрээһиннэр ыытылыннылар.
В.О. Каратаев аатынан Олоҥхо дьиэтигэр оһуокайдьыт, тойуксут, алгысчыт, хомусчут-импровизатор, Бүлүү улууһун сыыйа тардыыга маастара, «Норуот айымньытыгар кылаатын иһин” бэлиэ хаһаайына Христина Федотовна Таскина олоҕун, айар талаанын туһунан ахтыы быыстапката тэрилиннэ. Быыстапканы Х.Ф.Таскина төрөппүт кыыһа Саха Өрөспүүбүлүкэтин Доруобуйа харыстабылын туйгуна, оһуокай тылын үтүөлээх этээччитэ, В.О. Каратаев аатынан олоҥхоһуттар уонна тойуксуттар народнай кэллэктииптэрин тойуксута Светлана Петровна Харлампьева салайыытынан турда. Ону тэҥэ Х.Ф. Таскина аатынан «Дьүрүһүй, дьырылаа, сыыйа тардар хомуһум» куйаар ситимин нөҥүө аһаҕас хомус тардааччылар күрэхтэрэ киэҥ далааһыннаахтык ыытылынна. Саха сирин араас муннуктарыттан Абыйтан, Чурапчыттан, Бүлүүттэн, Кэбээйиттэн барыта 51 киһи кыттыыны ыллылар.
Маны таһынан «Олох эргиирэ» онлайн-бырайыак радионан уонна инстаграм сирэйгэ аһаҕас эпииргэ «Бүлүү хомус туоната» биэрии ыытылынна. Биэрии ыалдьытынан Саха Өрөспүүбүлүкэтин Культуратын туйгуна, Саха Өрөспүүбүлүкэтин уус-уран оҥоһуктарын маастара, Саха Өрөспүүбүлүкэтин худуоһунньуктарын Союһун чилиэнэ. Иван Федорович Захаров-Кылыадьы Уус аатынан Хомус Дьиэтин сэбиэдиссэйэ Сыроватская Сардана Иннокентьевна буолла. Ахсынньы 4 күнүгэр нэһилиэнньэҕэ Дегтярева Альбина Михайловна кыттыылаах хомуска оонньууга маастар кылаас ыытылынна. Нэдиэлэ устата Олонхо дьиэтигэр хомус нэдиэлэтэ тиһигин быспакка оскуола оҕолоругар кылаас чаастара, маастар кылаастар ыытылыннылар. Бу курдук Бүлүү улууһа хомус туонат
Хомус барахсан угуйар тойуга өрүүтүн үрдүккэ кынаттыы, ыҥыра туруохтун,
Бүлүү хомуһун үйэлээх үгэстэрэ салҕана, сайда турдун!
