М.Н.Жирков аатынан оройуоннааҕы культура Дыбарыаһыгар Арассыыйа гражданскай авиациятын 100 сыллаах үбүлүөйүгэр аналлаах үөрүүлээх тэрээһиҥҥэ Бүлүү авиациятын бары салааларын ытык-мааны бэтэрээннэрэ уонна билигин үлэлии-хамсыы сылдьар үлэһит дьоно муһуннулар. Оскуола оҕотун билим-тиэхникэ эйгэтигэр уһуйар киин (директор П.П.Охлопков) үөрэнээччилэрин оҥоһуктарын, аэропорт хаартыскаларын быыстапкаларын көрөөччүлэр олус сэргээтилэр.
Бүлүүгэ авиация историятын туһунан Бүлүүтээҕи аэропорт директора Л.С. Иванов иһитиннэрдэ. Авиатордарга Бүлүү улууһун баһылыга С.Н. Винокуров, улуус депутаттарын Сэбиэтин бэрэссэдээтэлэ Г.С. Корякин, Бүлүү куоратын баһылыгын солбуйааччы Н.В.Иванов наҕараадалары туттардылар. Улуус нэһилиэктэрин баһылыктара, тэрилтэлэр салайааччылара истиҥ эҕэрдэлэрин тириэртилэр. Бэтэрээннэр ааттарыттан Саха Республикатын салгын транспорын үтүөлээх үлэһиттэрэ Семен Васильевич Кырбасов, Виктор Николаевич Платонов махтаннылар.
Үбүлүөйүнэн ылбаҕай ырыаларын, үҥкүүлэрин Лазарь Гуляев, Галина Анисимова, «Ай-ыллаа» вокальнай ансамбль (салайааччы СР культуратын туйгуна О.Н.Корякина), «Алгыстаана» үҥкүү бөлөҕө (салайааччы СР үөрэҕириитин туйгуна О.В.Павлова) бэлэхтээтилэр.
Судаарыстыба уонна дьон-сэргэ олоҕун уйгутун тупсарар авиациябыт сайда турдун, күөх халлаан киэҥ, үрдүк ньуурунан үтүөҕэ, эйэҕэ эрэ тардыһар ыра санаалаах айанныы сылдьыаҕыҥ!
