Эрдэттэн промышленноска үлэлиир булгуруйбат санаалааҕа.
Алтынньы 27 күнэ -Социалистическай Үлэ Геройа П. И.Быканов төрөөбүт күнэ
Прокопий Иннокентьевич Быканов 1938 сыл алтынньы 27 күнүгэр Халбаакы нэһилиэгин Тыымпы алааһыгар күн сирин көрбүтэ.
Борокуоппай кыра эрдэҕиттэн сытыы-хотуу, олус сүрэхтээх этэ. Халбаакы түөрт кылаастаах оскуолатыгар 8 биэрэстэлээх сиртэн сатыы кэлэн үөрэнэрэ. 4 кылаас кэнниттэн оттоһон-мастаһан, оҕус сиэтэн, ферма сүөһүтүгэр уу баһан, от тиэйэн үлэлээбитэ. Олох кыратыттан Молотов аатынан колхозка сааскы, күһүҥҥү үлэлэргэ түүннэри-күнүстэри улахан дьону кытта толлубакка харса суох тэҥҥэ сылдьара. Киэһээҥи өттүгэр үөрэнэн 7 кылааһы бүтэрбитэ. Кыратыттан күүстээх үлэҕэ эриллэн, ыарахантан чаҕыйбат, хорсун-хоодуот, буспут-хаппыт үлэһит киһи буола үүммүтэ.
На фото — Во время работы на бульдозере в прииске Депутатский.
Улаатан баран үс сыл Чукоткаҕа армияҕа сулууспалаабыта. Салгыы Дьокуускайга 1 –дээх ПТУ-га үөрэнэн тракторист идэтин баһылаабыта. Үөрэҕин бүтэрээт хоту Үөһээ Халыма совхоз Арыылааҕар үлэлии барбыта.
1967 с. Прокопий Иннокентьевич Усуйаана Силээннээҕэр көспүтэ. 1971 сылтан Депутатскайдааҕы хайаны байытар комбинакка хорҕолдьун хостооһунугар бульдозериһынан үрдүк таһаарыылаахтык үлэлээбитэ Дэгиттэр билиилээх киһини 1974 с. Киин бириискэҕэ 70-тан тахса механизатор үлэлиир комплекснай биригээдэтин салайааччытынан анаабыттара.
Хайаны байытар комбинакка уопсайа 23 сыл устата үлэлээбитэ. Бу кэм устата ирбэт тоҥ усулуобуйатыгар үлэ саҥа, бастыҥ ньымаларын киллэрэн биир единица техника оҥорон таһаарыытын биллэ үрдэппитэ Үлэтин көрдөрүүтүнэн IX пятилетка түмүгүнэн “Бочуот знага”, X пятилетка түмүгүнэн “Норуоттар доҕордоһуулара” орденнарынан наҕараадаламмыта.
На фото — Секретарь обкома КПСС И.И. Пьянков вручает Золотую звезду Героя Социалистического труда и орден Ленина, январь 1985 г.
Бастыҥ механизаторга XI пятилетка түмүгүнэн Саха сиригэр кыһыл көмүһү хостуур промышленность сайдыытыгар үтүөлэрин уонна ол үлэни толорууга тус геройдуу быһыытын иһин ССРС Үрдүкү сэбиэтин Президиумун 1985 сыл тохсунньу 15 күнүнээҕи ыйааҕынан Социалистическай Үлэ Геройун үрдүк аата иҥэриллибитэ уонна Ленин уордьана, “Серп и молот” кыһыл көмүс мэтээлэ туттарыллыбыта.
Үлэни өрө туппут П.И.Быканов общественнай үлэҕэ эмиэ олус көхтөөҕө. Саха АССР, ССРС Үрдүкү сэбиэттэрин депутаттарынан быыбардаммыта. ССРС өҥнөөх металлургияҕа профсоюһун киин комитетын чилиэнинэн талыллан үлэлээбитэ.
Прокопий Иннокентьевич улахан дьиэ кэргэн тапталлаах аҕата. Кэргэнэ Мария Николаевналыын ыал буолан үс оҕону төрөппүтэ. Эйэҕэс эһээ, хос эһээ буолар үөрүүтүн билбитэ.
П.И.Быканов 2014 сыл тохсунньу 4 күнүгэр Дьокуускай куоракка өлбүтэ
Герой үрдүк аата 2014 сыл кулун тутар ый 6 күнүгэр үөрэммит Халбаакытын оскуолатыгар иҥэриллибитэ. Кини бюһа өссө бэйэтэ тыыннааҕар 2013 сыллаахха Бүлүү куоратыгар Геройдар аллеяларыгар туруоруллубутун кэлэн көрөн астынан барбыта.
Бүлүүлэр киэн туттуубут Быканов П.И. дьоһун олоҕо, бэриниилээх үлэтин холобура, сүҥкэн ситиһиитэ кэлэр кэнэҕэски ыччакка холобур, инники олоххо ситиһиигэ сирдьит буола турдун!
Социалистическай Үлэ Геройа П.И.Быканов туһунан сиһилии бу ый, о.э алтынньы 28 күнүгэр “Бүлүү” араадьыйаҕа 103, 1 FM долгуҥҥа, киэһэ 17.00 чаастан анал биэриигэ истиҥ.
На фото — С помощником бригадира Н.М.Макаровым
Фото — На съезде с народным депутатом Э.М.Панфиловой г. Москва, 1989 г.
На фото — Встреча с учащимися Халбакинской школы
На фото — Выступление на 75-летнем юбилее колледжа -ЯИПК
