М.Н. Жирков аатынан оройуоннааҕы культура Дыбарыаһыгар Аҕа дойдуну көмүскээччилэр күннэригэр аналлаах “Албан аат, хорсун быһыы суолунан” аһымал кэнсиэр буолла.
Бүлүүбүт улууһуттан үгүс биир дойдулаах уолаттарбыт модун Арассыыйабыт көмүскэлигэр сулууспалыы сылдьаллар.
Кэнсиэр республикатааҕы “Аҕа дойдуну көмүскээччилэргэ сүгүрүйэбит” хоһоон күрэҕин Кылаан кыайыылааҕа бойобуой дьайыы бэтэрээнэ, буойун-учуутал Барыыс Баһылайап хоһоонун ааҕыынан саҕаланна.
Бэйэлэрин ырыаларын, үҥкүүлэрин Наталья Жиркова, Варя Егорова, Нина Боронова, Анатолий Софронеев, Муза Сергеева, Виталий Мучурунов, Надежда Корякина, «Үрүччэ» оҕо үҥкүү ансамбла (сал. Туяра Колесова), «VILDANCE» үҥкүү коллектива (сал. Юлия Федорова), “Алгыстаана” (сал. Ольга Павлова), Анжелика Акимова уонна Татьяна Попова, “Айылгы” эстраднай ансамбль бэлэхтээтилэр.
Г.С. Донской аатынан №2 — дээх орто оскуола 2 “а” уонна 4 “а” кылаас үөрэнээччилэрэ (кылаас салайааччылара Н.Р. Петрова, Д.К.Павлова, муз. сал. Р. В.Торотоева) “Мирные небеса”, “Защитники Отечества” ырыалары өрө көтөҕүллүүлээхтик толордулар.
Кэнсиэр билиэтинэн киирбит үп байыаннай дьайыыга сылдьар уолаттарбытыгар көмө буолан барыаҕа.
Аҕа дойду көмүскээччилэригэр ис сүрэхпититтэн махтанабыт, эҕэрдэлиибит, күүстээх эр санааны, булгуруйбат дьулууру баҕарабыт!
Сиргэ ил-эйэ, дьол эрэ уйаланнын!
