Бүгүн И.М. Гоголев-Кындыл аатынан Бүлүүтээҕи модельнай библиотекаҕа биир дойдулаахпыт М.К. Аммосов аатынан Хотугулуу-Илиҥҥи бэдэрээлинэй үнүбэрсиэт норуоттар остуоруйаларын уонна култуураларын Үнүстүүтүн саха литэрэтиирэтин хаапыдыратын сэбиэдиссэйин, билэлиэгийэ билимин дуоктарын, Саха Өрөспүүбүлүкэтин култууратын үтүөлээх үлэһитин, Саха Өрөспүүбүлүкэтин суруйааччыларын Сойууһун чилиэнин Валентина Григорьевна Семенованы кытта истиҥ-иһирэх көрсүһүү буолла.
А. И. Софронов-Алампа төрөөбүт күнүгэр аналлаах көрсүһүүнү библиотека кыраайы үөрэтэр салаатын салайааччыта Луиза Кононова иилээн-саҕалаан ыытта.
Валентина Григорьевна научнай уонна уус-уран үлэлэрин улахан быыстапката дьон болҕомтотун тардыан тарта.
Көрсүһүүгэ биир дойдулаахтара өкүндүлэр, педколледж студеннара, культура үлэһиттэрэ, үөлээннээхтэрэ сылдьан Валентина Григорьевнаны 60 сааһынан эҕэрдэлээтилэр, үлэтин-хамнаһын сиһилии билистилэр, сөхтүлэр, биһирэбиллэрин биллэрдилэр. Биир дойдулааҕа Г.Г. Иванов, саха суруйааччыта Н.И. Иванов, библиотекарь М.Е. Егорова, бииргэ үөрэммит доҕотторо Алампаны үөрэтэр дьоһуннаах үлэтин иһин махталларын эттилэр, салгыы айымньылаах үлэни баҕардылар.
Бүлүү улууһугар культура сайдыытын уонна норуот айымньытын Киинин
салайааччыта А.А. Дашевская Махтал суругун Н.Н.Иванова туттарда.
