Cэтинньи 14 күнүгэр П.А.Ойуунускай аатынан саха академическай тыйаатырыгар «Алампа” уопсастыбаннай бириэмийэ олохтоммута биэс сылын бэлиэтээһин уонна 2023 сыллааҕы бириэмийэни туттарыы буолла. Бу бириэмийэ саха литэрэтиирэтин уонна ускуустубатын айар талааннаахтарыгар туттарыллар, сыллата 10-нуу номинация кыайыылаахтара ааттаналлар.
Скульптор Николай Чоччасов айан оҥорбут бириэмийэ ытык бэлиэтин ааспыт сыллардааҕы бириэмийэ хаһаайыттара туттарар үгэстэрэ олохсуйда. 2023 сыллааҕы «Алампа» бириэмийэтин номинацияларын ыллылар:
«Уран тыл» – литературовед, билэлиэгийэ билимин дуоктара, Саха сирин суруйааччыларын Сойууһун чилиэнэ, М.К. Аммосов аатынан Хотугулуу-Илиҥҥи федеральнай университет профессора Варвара ОКОРОКОВА;
«Кылаан дьүрүскэн айааччы» –композитор, Саха сирин композитордарын Сойууһун бэрэстээтэлэ Николай МИХЕЕВ;
«Өрөгөйдөөх өйөөччү» – «АрктикКапитал» хампаанньа салайааччыта Матвей ЕВСЕЕВ;
«Дэгиттэр режиссёр» – Саха академическай тыйаатырын режиссера Сергей ПОТАПОВ;
«Чаҕылхай артыыс» – Саха академическай тыйаатырын артыыһа Иннокентий ЛУКОВЦЕВ;
«Чаҕылхай артыыска» – Олоҥхо тыйаатырын артыыската НьургуйаанаКОВА;
«Ырыа айааччы» – самодеятельнай композитор, Н.И.Ылахова аатынан Бүлүүтээҕи национальнай-култуурунай Киин исписиэлииһэ Иван ТУЛАСЫНОВ
«Дархан ойууһут» — худуоһунньук, ювелир, скульптор Александр МАНЧЖУРЬЕВ;
«Киинэ эйгэтин чыпчаал үлэһитэ» – киинэ уонна телевидение звукорежиссера Иннокентий СИВЦЕВ; «Алампаҕа сүдү бэриниилээх» – Е.М.Ярославскай аатынан судаарыстыбаннай түмэл Чөркөөхтөөҕү филиалын сэбиэдиссэйин э.т. Михаил ПРОТОДЬЯКОНОВ.
Дьоро киэһэни Саха тыйаатырын артыыстара киэргэттилэр. Иван Туласынов мелодиятыгар «Таптаатым музыка тойугун», (И.Туласынов тыллара), «Бүлүүм тыына, салгына» (Г.Фролова тыллара) ырыаларын Терентий Егоров, Иоганн Матвеев толордулар.
Бүлүүлэр биир дойдулаахтарбыт Николай Михеев, Александр Манчжурьев, Иван Туласынов ситиһиилэринэн киэн туттабыт, эҕэрдэлиибит, өссө да үрдүк чыпчааллары алгыыбыт!
