Алтынньы ый 10 күнүгэр Бүлүү куоратын М.Н. Жирков аатынан Оройуоннааҕы култуура Дыбарыаһыгар улууспут култууратын бэтэрээннэригэр астаах-үөллээх, ырыалаах-тойуктаах олус истиҥ тэрээһини улуус културатын идэлээх сойууһа, култуура тэрилтэлэрэ уонна Дыбарыас үлэһиттэрэ тэрийэн ыыттылар. Оройуоннааҕы култуура сайдыытын уонна норуот айымньытын Киинин салайааччыта Алена Дашевская, улуус култууратын идэлээх сойууһун бэрэссэдээтэлэ Александра Иванова бэтэрээннэргэ анаан эҕэрдэ тылларын, ону сэргэ махтал тылларын анаатылар. Тэрээһини «Сулус суһума» айар бөлөх ырыаһыттара бэйэлэрин ылбаҕай ырыаларынан киэргэттилэр. М.Н. Жирков аатынан оҕо ускуустубатын оскуолатын уһуйааччылара Алексей Васильев уонна Алексей Иванов байаанынан аҕам саастаахтарга анаан оонньоон, дуоһуйуохтарыгар дылы үҥкүүлэттилэр. Оһуохай үтүөлээх этээччилэрэ Владимир Николаев, Николай Афанасьев-Айдаман саха төрүт үҥкүүтүн оройуттан туттулар. Кэлбит ыалдьыттар дуоһуйа-астына сынньанан тарҕастылар. Тэрээһини С.Ө. култууратын туйгуннара, Оройуоннааҕы култуура Дыбарыаһын үлэһиттэрэ Кристина Буслаева уонна Николай Афанасьев-Айдаман иилээн-саҕалаан ыыттылар.
