Маннык ааттаах быыстапканы Саҥа дьыл алыптаах күннэрэ үүнээри турдахтарына, ахсынньы 24 күнүгэр М.Н.Жирков аатынан культура оройуоннааҕы дыбарыаһыгар Бүлүү улууһун Үгүлээт нэһилиэгиттэн төрүттээх Ньургуйаана Николаева арыйда.
Тулалыыр эйгэни сэҥээрэ көрөр кыракый кыысчаан олох кыра сааһыттан уруһуйдууру сөбүлээн дьарыктанан саҕалаабыт. Тугу сэргии көрбүтүн хартыынаҕа кубулутан испит. Кини билигин олохтоох оскуола 11-с кылааһын бастыҥ үөрэнээччитэ. Төһө да ыраах нэһилиэккэ ойуулуур-дьүһүннүүр анал оскуола суоҕун иһин, кини айылҕа анаабыт талаанын бэйэтэ сайыннаран, уонунан ааҕыллар бииртэн биир ураты, дьоһуннаах үлэлэринэн анал быыстапкатын тэрийэн дьон дьүүлүгэр таһаарда.
Бу долгутуулаах күнүнэн Ньургуйаананы улууспут баһылыга С.Н.Винокуров, үөрэҕирии улуустааҕы салалтатын начальнига Н.М.Семенова, культура сайдыытын уонна норуот айымньытын оройуоннааҕы киинин салайааччыта А.А.Дашевская, үөрэнэр оскуолатын коллектива, аймахтара, биир дойдулаахтара эҕэрдэлээтилэр. Кинилэр бары эдэр уруһуйдьут дьоҕурун өссө да сайыннаран иһэригэр, оскуоланы ситиһиилээхтик бүтэрэн инники идэтин таларыгар талаанын таба туһанарыгар баҕардылар.
Ураты дьоҕурдаах ыччаппыт бастакы быыстапката арылынна. Мустубут дьон кини киһи быһыытынан кэрэтин бэлиэтии көрдө. Көмөлөспүт, өйөөбүт дьонугар махтанан эппит ис сүрэҕиттэн тахсыбыт тылларын долгуйа иһиттэ.
Күндү биир дойдулаахтарбыт, бу күннэргэ М.Н.Жирков аатынан культура оройуоннааҕы дыбарыаһын иккис этээһигэр кэлэн Ньургуйаана сонун, хатыламмат үлэлэрин дуоһуйа көрүҥ, сыаналааҥ. Эдэр киһи айар үлэтин киэҥ аартыга арыллан, искусство эйгэтигэр саҥа, сонун хардыылары оҥороругар алгыскытын анааҥ, тирэх буолуҥ!
