Олунньу 8 күнүгэр В.О. Каратаев аатынан Олоҥхо дьиэтигэр Сахабыт сиригэр Олоҥхо Дьиэлэрин биир ситимин тэрийиигэ аналлаах култуурунай экспедиция чэрчитинэн Бүлүү улууһугар “Ыччат олоҥхоһут” ассоциациятын филиалын үөрүүлээх арыллыыта буолан ааста.
Бу тэрээһиҥҥэ кыттыыны ыллылар саха олоҥхотун эдэр, саастаах сэҥээрээччилэрэ. Тэрээһини саха төрүт үгэстэрин, ырыатын-тойугун, олоҥхотун утумнаахтык үөрэтэр «Ыллык» (салайааччы В.С.Николаев) түмсүү биир дойдулаахпыт Прокопий Максимов «Ала Хотой аттаах Алтан Дьааһын бухатыыр» олоҥхотуттан быһа тардыыны толордулар.
Республиканскай “Ыччат олоҥхоһут” ассоциациятын президенэ Анастасия Алексеева түмсүү сыалын-соругун туһунан бэрт сэргэхтик билиһиннэрдэ, ассоциация туһунан элбэҕи кэпсээтэ.
Ону таһынан В.О.Каратаев аатынан Олоҥхо норуодунай бөлөҕүн салайааччыта С.Т. Иванова, “Алгыс” фольклорнай бөлөх салайааччыта А.П. Евсеева бэйэлэрин санааларын эттилэр. С.Т. Иванова бөлөҕө олоҥхолортон быһа тардыылары толордо.
Бу тэрээһин түмүгүнэн Бүлүү улууһун “Ыччат олоҥхоһут” түмсүүтүн салайааччытынан эдэр кэскиллээх олоҥхоһут Капитон Петрович Львов талылынна, ону сэргэ баҕалаах эдэр ыччаттар бу түмсүүгэ киирдилэр. Бу түмсүү инникитин ситиһиилээхтик үлэлииригэр баҕарабыт.
