Бүгүн, ахсынньы ый 19 күнүгэр Дьокуускай куорат А.Е Кулаковскай-Өксөкүлээх Өлөксөй аатынан Норуоттар доҕордоһууларын дьиэтигэр Россия норуоттарын культурнай нэһилиэстибэлэрин сылыгар анаммыт «Наше наследие» фестиваль түмүктүүр III түһүмэҕэ ыытыллар.
Сахабыт сиригэр олорор төрүт омуктар культураларын хайдах харыстаан илдьэ сылдьарбытын, ханнык таһымҥа таһаарбыппытын көрдөрөр улахан фестиваль республика үрдүнэн кулун тутар ыйтан саҕаламмыта. I түһүмэх- улуустарга, II түһүмэх — зоналарынан 9 улуус кииннэригэр. Ол иһигэр бэс ыйын 11 күнүгэр Бүлүү куоратыгар Горнай, Үөһээ-Бүлүү, Бүлүү, Эдьигээн талааннаахтарын көрүү тэриллибитэ.
Бүгүн зона көрүүтүн кыайыылаахтара уопсайа 333 кыттааччы норуот айымньыларынан 5 көрүҥҥэ: ырыаҕа, үҥкүүгэ, фольклорга, театральнай туруорууларга уонна норуот уус-уран оҥоһуктарыгар күрэстэһиэхтэрэ.
Бүлүү улууһун баай историятын, илдьэ кэлбит культуратын культура сайдыытын уонна норуот айымньытын оройуоннааҕы киинин холбоһутаах хора (салайааччы О.Н.Корякина) М.Жирков, Г. Литинскэй «Сыгый Кырынаастыыр» операларын түмүк ырыатынан, Н.Г. Чернышевскай аатынан Бүлүүтээҕи профессионально-педагогическай колледж «Айылгы» ырыа, үҥкүү народнай коллектива (салайааччы В.В.Томскай) “Өрөгөй үҥкүүтүнэн”, Н.И.Ылахова аатынан “Алгыс” культура национальнай киинин И.М.Гоголев -Кындыл аатынан народнай театра (салайааччы М.А.Соколова) Баһылай Харысхал «Сэрии тыйыс тыына» спектаклын быһа тардыытынан көмүскүөхтэрэ. Уус-уран оҥоһуктары көрүү-быыстапкаҕа бэйэтин хатыламмат үлэлэрин Саха Өрөспүүбүлүкэтин норуотун маастара Николай Степанов туруорда.
Республикатааҕы көрүү түмүгүнэн кыайыылаахтарга уопсайа 3 мөлүйүөн солкуобай суумалаах харчынан бириистэр туттарыллыахтара. Бастыҥтан бастыҥнар кэлэр сыл муус устар ыйыгар Бурятияҕа Бүтүн Россиятааҕы фестивальга кыттар путевканы ылыахтара.
Бүлүүбүт аатын ааттатан кытта сылдьар талба талааннаах биир дойдулаахтарбытыгар өрөспүүбүлүкэ улахан түһүлгэтигэр умнуллубат чаҕылхай түгэннэри, үрдүк ситиһиилэри баҕарыаҕыҥ!
