Бүлүү улууһун олохтоохторо, ыалдьыттара! Бүгүн сэтинньи 30 күнүгэр Бүлүү улууһугар «Өбүгэ үгэһин утумнаан» III аһаҕас улуустааҕы быыстапка-күрэх кыттыылаахтарын чиэстиир дьоро күнэ буолан ааста.
Быйылгы 2022 сылы дойдубут Президенэ Владимир Путин Россия норуоттарын култуураҕа нэһилиэстибэтин сылынан биллэрбитэ. Оттон Сахабыт Республикатыгар Ийэ сыла, Бүлүүбүт улууһугар Бүлүү чулуу дьонугар анаммыт сыл буолар.
Былыр-былыргыттан Бүлүү сирэ-уота биллэр-көстөр тимир, мас уустарынан, көтүллүбэт сииктээх иистэнньэҥнэринэн, хагдарыйан турар маһы көҕөрдө туойар уус-уран тыллаах олоҥхоһуттарынан, тойуксуттарынан, ырыаһыттарынан биллэр, суон сураҕырар. Күн бүгүн Бүлүү улууһугар 12 Саха Республикатын норуотун маастардара, 13 Саха Республикатын уус-уран оҥоһуктарын маастардара, 10 Бүлүү улууһун норуотун маастардара айымньылаахтык, үрдүк таһаарыылаахтык үлэлииллэр. Кинилэр истэригэр «ӨБҮГЭ УТУМА» олохтоох общественнай тэрилтэ салаайааччы Виктория Алексеевна Леонтьева таһаарыылаахтык үлэлии-хамсыы сылдьар. Быыстапка-күрэх түмүгүнэн кыттааччылар сертификаттарынан, махтал суруктарынан, сыаналаах бириистэринэн наҕараадаланнылар.
Сахабыт Сирин уонна улууспут иискэ-ууска үөрүйэхтэрин тилиннэрэн, харыстаан тута сылдьар уонна сайыннарар уран тарбахтаах талааннаахтарыгар өссө төгүл махтанабыт, айар тутар үлэлэригэр салгыы саҥа ситиһиилэри баҕарабыт.
