Кулун тутар 28 күнүгэр П.А.Ойуунускай аатынан Саха государственнай литературнай музейыгар Саха народнай поэта, тылбаасчыт, Саха АССР культуратын үтүөлээх үлэһитэ, П.А.Ойуунускай аатынан государственнай бириэмийэ лауреата Михаил Елисеевич Тимофеев төрөөбүтэ 90 сылыгар аналлаах «Күүтэр сырдык санааларым» диэн истиҥ ахтыы киэһэтэ буолла.
Бэлиэ түгэҥҥэ анаммыт үөрүүлээх тэрээһиҥҥэ суруйааччылар, журналистар, поэт биир дойдулаахтара Бүлүүттэн, Бороҕон, Кыргыдай нэһилиэктэриттэн, Дьокуускайга олорор чугас аймахтара кытыннылар.
Саалаҕа суруйааччы кинигэлэрин, хаһыакка, сурунаалга суруйууларын, тутта сылдьыбыт тээбириннэрин көрдөрөр быыстапка туруорулунна.
Киэҥ кэпсэтиини саха народнай поэта, Саха сирин Суруйааччыларын сойууһун бэрэссэдээтэлэ Наталья Харлампьева салайан ыытта.
Саха ааҕааччытын кутун туппут суруйааччыга сүгүрүйэн кэлбит дьону эҕэрдэлээн, поэты ахтан-санаан тыл эттилэр СӨ Култуураҕа уонна духуобунай сайдыыга министрин солбуйааччы М.В.Силина, Саха народнай суруйааччыта, литературнай музей директора Н. А. Лугинов, Россия уонна Саха Республикатын народнай артыыската А.С.Адамова, СӨ радиотыттан В.Д.Петрова, Национальнай библиотекаттан Т.А. Никифорова-Тайаана, аймахтарыттан А.К.Тимофеева о.д.а.
Биир дойдулаахтара, Бүлүүлэр, Михаил Елисеевиһы чахчы үрдүктүк туталларын улуус баһылыгын социальнай политикаҕа солбуйааччы А.А.Прокопьев, Кыргыдай нэһилиэгин баһылыга В.Е.Александров, Бороҕон нэһилиэгин баһылыгын солбуйааччы А.А.Колтовская улууска, нэһилиэктэргэ ыытыллар үлэни кэпсээн, поэт хоһооннорун ааҕан бигэргэттилэр.
Поэт олох кэрэтин таба көрөн сыаналыырга үөрэтэр, иҥэринэргэ такайар айымньыларын үйэтитэргэ ис дууһаларыттан ылсан үлэлэһэ сылдьар Михаил Елисеевич төрөппүт кыыһа, «Саха народнай суруйааччылара” серия үс томун хомуйан таһаарбыт А.М.Тимофеева, филология наукатын доктора В.Г. Семенова, «Сулустан сураспытым…” ырыанньыгы хомуйан таһаарбыт уонна салгыы саҥа электроннай хомуурунньукка үлэлэһэ сылдьар С.А.Адамова кэскиллээх үлэлэрин билиһиннэриилэрэ улаханнык кэрэхсэннэ.
200 тахса ырыа буолбут хоһоонноох лирик поэт ылбаҕай ырыаларыттан Бүлүүттэн төрүттээхтэр: аймаҕа Николай Спиридонов, мелодист Владимир Колтовской, эдэр ырыаһыттар Сайсары Куо, Матрена Семенова толорон саала иһин долгуттулар.
Ити курдук народнай поэт Михаил Тимофеев үйэлэргэ айан хаалларбыт Сахабыт Республикатын Өрөгөйүн ырыатынан Россияҕа норуоттар культурнай нэһилиэстибэлэрин, Саха АССР төрүттэммитэ 100 уонна Бүлүү улууһун Чулуу дьонугар анаммыт сыл иһинэн ыытыллыбыт улахан тэрээһин киэҥ хабааннаахтык, бэрт сэргэхтик ааста.
