Бэс ыйын 8 күнүгэр, М.Н. Жирков аатынан култуура дыбарыаһыгар ытыктанар кыраайы үөрэтээччи, педагогическай үлэ бэтэрээнэ Николай Семенович Миронов төрөөбүтэ 80 сылыгар анаммыт ахтыы киэһэтэ ыытылынна.
Бүлүүбүт ыччатын үөрэххэ-билиигэ такайбыт, улуус дириҥ историятын өр сылларга сиһилии үөрэтэн, чинчийэн, сурукка тиһэн хаалларбыт үтүөкэннээх үлэһит бэлиэ күнүн аатыгар биир идэлээхтэрэ, тэрилтэлэр салайааччылара, үөрэппит оҕолоро тоҕуоруһа муһуннулар.
Төрөөбүт дойдутугар муҥура суох бэриниилээх, олоххо өрүү көхтөөх сэмэй үлэһит олоҕун, умсулҕаннаах үлэтин тула сэргэх кэпсэтии таҕыста , элбэх сонун бэлиэтээһиннэр оҥоһулуннулар.
Николай Семенович муударай учуутал, салайааччы, архив, музей эппиэттээх үлэһитин быһыытынан үрдүктүк сыаналанна.Кини туттубут малын-салын, оҥорбут дөкүмүөннэрин, суруйан хаалларбыт кинигэлэрин, ыстатыйаларын быыстапкатын мустубут дьон сэҥээрэн көрдүлэр.
“Бүлүү улууһа (оройуона)” муниципальнай оройуон баһылыга С.Н.Винокуров бэйэтин ахтыытыгар Николай Семенович киһи, үлэһит быһыытынан холобур буолар олоҕу олорбутун, кини аата Бүлүү дьонугар мэлдьи тыыннаах хаалыаҕын чопчу бэлиэтээтэ.
Ытык киһи дьиэ кэргэн амарах аҕата, эйэҕэс эһээтэ буоларын уола Юрий Николаевич дьиэ кэргэнэ кырачаан сиэннэринээн кэлэн бигэргэттэ уонна тэрийээччилэргэ истиҥ махталын тириэртэ.
Бүлүү улууһун историятыгар, өлбөт-сүппэт үйэлээх сүнкэн кылаатын киллэрбит кыраайы үөрэтээччи үлэлэрэ үйэттэн-үйэҕэ кичэллээхтик хараллан, махталлаах ааҕааччыларынан туһанылла туруохтара.
Оройуоннааҕы культура сайдыытын уонна норуот айымньытын киинэ Николай Семенович аатын үйэтитиигэ анаммыт бастакы көрсүһүүнү тэрийсибит улуус кыраайы үөрэтээччилэрин түмсүүтүгэр (Саввинова К.Е.), П.Х.Староватов аатынан музейга (Т.Н.Афанасьева), И.М.Гоголев-Кындыл аатынан кииннэммит библиотекаҕа (Николаева С.С.), улуустааҕы архивка (Федотов Д.Д.) махталын тириэрдэр. Кэпсэтиигэ киирбит этиилэр сотору кэминэн туолан олоххо киирэллэригэр бары бигэтик эрэнэбит.
