Муус устар 18 күнэ аан дойду үрдүнэн пааматынньыктар уонна историческай миэстэлэр күннэринэн буолар. Бу күнү 1982 сыллаахха ЮНЕСКО ассамблеята төрүттээбитэ. История мэҥэ бэлиэлэрэ буолан хаалбыт пааматынньыктар, өйдөбүнньүк миэстэлэр төһө да сыл- хонук аастар дьоҥҥо-сэргэҕэ ааспыт кэми саната, кэпсии турар аналлаахтар.
Онтон биһиэхэ, Бүлүү дьонугар, бу бэлиэ күн барыбыт сүрэхпитигэр сөҥмүт, өйбүтүгэр-санаабытыгар дириҥник иҥэн хаалбыт Хохочой алдьархайын күнүнэн биллэр. Олоҕу саҥа олорон эрэр эдэркээн дьон Сэбиэскэй былааһы олохтооһуҥҥа тыыннарын толук уурбуттара быйыл 100 төгүрүк сыла туолар.
Уһун сыллар тухары Бүлүү куоратыттан 40 биэрэстэлээх Өкүндү нэһилиэгин Хохочойугар, Дьокуускайдыыр суол кытыытыгар турар, хорсун санаалаах ыччаттарга анаммыт өйдөбүнньүк обелиска хайаан да дьон тохтоон кэриэстээн ааһара. Элбэх көлүөнэ эдэр ыччат Комсомол төрөөбүт күнүгэр- алтынньы 29 уонна муус устар 18 күннэригэр сыллата ыытыллар митиннэргэ көхтөөхтүк кыттара. Араас сиртэн анаан-минээн делегациялар кэлэн Хохочой геройдарыгар сүгүрүйэллэрэ. Миэстэтигэр ыччаттарга хайыһар десаннара, спортивнай күрэхтэр, байыаннай оонньуулар ыытыллаллара. Маныаха сүрүн тэрийээччинэн Өкүндү нэһилиэгин олохтоох дьаһалтата, оскуолата, үлэҕэ-үөрэххэ көхтөөх олохтоохторо буолаллара.
Саха сиригэр сэбиэскэй былаас олохтонор уустук кэмигэр нуучча, саха, украинец омуктартан турар этэрээт муус устар 18 күнүгэр Хохочой түҥкэтэх тайҕатыгар, тэҥэ суох киирсиигэ, бастаанньыттар тоһуурдарыгар түбэһэн кыыллыы сэймэктэнэн өлбүттэрэ. Икки эрэ киһи, байыас Н. Борисов уонна сирдьит В.С. Сивцев тыыннаах хаалбыттара.
Бүлүүгэ сэбиэт былааһын иһин Геройдуу быһыыны оҥорбут кыһыл армеецтар: Василий Шатаев, Иван Артемьев, Георгий Бирюков, Григорий Корж, Николай Борисов, комсомолецтар, Бүлүү куоратын II ступеннаах оскуолатын үрдүкү кылааһын үөрэнээччилэрэ: Николай Винокуров, Нифонт Иванов, Гаврил Кухаренко, Сергей Корякин, Петр Попов, Софрон Попов, Вениамин Тимофеев, Ксенофонт Томскай, оробуочайдар уонна сулууспалаахтар: Дмитрий Григорьев, Василий Иванов, Никифор Иванов, Николай Иванов албан ааттара хаһан да умнуллубат.
Бүтүн биир үйэ саастаах Хохочой алдьархайа сурукка тиһиллэн, көлүөнэттэн көлүөнэҕэ тиэрдиллэ туруохтаах.
